Riesling-Silvaner
Maiafeld

Am Fuass vum Falknis, hoch überem Städli Maiafeld beherbergend miar Sie im Riesling-Silvaner SCHLOF-FASS. Speziell in Maiafeld hemmer grad zwei SCHLOF-FÄSSER hera gstellt. Das git Ihna Möglichkeit, mit bis zu vier Nasa bi üs z’pfusa. Also tiptop für Verliabti, Familia oder befründeti Päärli.

Nur as paar Minuta vum weltbekannta Heididorf und a Katzasprung vum Heidibrunna und am Wanderweg zur Heidialp pfusend Sie im SCHLOF-FASS. D’s Fass zum pfusa het kuscheligi Bettdeckina für a tüüüfa, gsunda Schlof und im andera Fass finden Sie dr Ufenthaltsbereich mit ama grossa Tisch, Bank, ama Wasserkocher und so wiiters. Wenn Sie als Familia oder befründets Paar areisend, hend miar noch as dritts Fass mit zwei wiiitera Schlofmöglichkeita für Sie. Man rechne… Genau: In Maiafeld hets also Platz für bis zu vier Nasa. Ds eigeta WC und as Lavabo für Katzawösch sind öpa so 40 Schritt entfernt im Abau vum Huus vu ihrna Gastgeber. A Duschi hemmer nid, aber z’Ragaz kasch go bädala in dr Therma oder au im Freibad.

Laag

Grad oberhalb vum Städtli Maiafeld stoht dr grossi Betrieb vu dr Familia Hermann. Direkt aschlüssend befindend sich riesigi Rebaflächina und dia beida SCHLOF-FÄSSER Riesling-Silvaner. Dia erreichend Sie am besta mit em Drohtesel, z’Fuass oder mit Ihrem Chlapf uf vier Räder. Dia nöchsti Bushaltestell isch 20 Minuta z’Fuass und dr Bahnhof öpa 40 Minuta z’Fuass z’erreicha.

Vum Fass us sind Sie ira Viertelstund im weltbekannta Heididorf und a Viertelstund in dia ander Richtig und Sie sind beim Heidibrunna. Dank dr perfekta Lag im Grüna gits zig Möglichkeita zum go spaziera oder für a Erkundigstour im Städtli.

Wiiteri Ideea für Usflüg rund um Maiafeld finden Sie unter da Usflugsziil bi «Ziit vertrödla».

GRAPE ESCAPES

Schwiiz Tourismus bütet zäma mit Swiss Wine Promoschen einzigartigi Übernachtigsmöglichkeita z’mitzt in da Wiiberga a. Grape Escapes bütet da Gäst Glegaheit, Schwiiz als Wiiland z’entdecka, sich mit dr Natur verbinda, tüfer itaucha und as unvergessliches und intims erlebnis z’ha. Au SCHLOF-FASS.CH isch a Teil vu dera Kampagna.